မြန်မာအတော်များများဟာ တစ်ယောက်ယောက် ဒုက္ခတွေ့တဲ့အခါ၊ စိတ်ဖိစီးမှုများ၊ စိတ်သောကတွေများ နေတဲ့အခါမျိုးမှာ “တရားနဲ့သာဖြေပါ”ဆိုတဲ့ အားပေးစကားကို မကြာမကြာ ပြောဖြစ်တတ်ကြပါတယ်။ အထူးသဖြင့် သူတို့နဲ့ ပတ်သက်တဲ့သူ တစ်ယောက်ယောက် ဘဝခရီးမှာ အဆိုးဆုံးနဲ့ ကြံတွေ့တဲ့အခါ၊ ကိုယ့်ကိုစွန့်ခွါပြီး ဘဝခရီးကို အရင်သွားနှင့်တဲ့အခါ၊ ဘယ်လိုမှ ဖြေဆည်လို့ မရတဲ့ အဆိုးဆုံး ကိစ္စတွေ ပေါ်ပေါက်လာတဲ့ အခါမျိုးတွေမှာ “တရားနဲ့ဖြေပါ”ဆိုတဲ့ ဒီစကားကို ပြောဖြစ်ကြတာ ဖြစ်ပါတယ်။ ခက်တာက သူများအတွက်မို့သာ ဒီစကားကို ပြောလိုက်ကြရပေမယ့် တစ်ခါတလေ ပြောတဲ့သူတွေ ကိုယ်တိုင်လည်း ဒုက္ခကိုယ်စီလေးတွေ ရှိနေတတ်ကြတယ် ဆိုတာကိုတော့ သူတို့ကိုယ်တိုင်ကလွဲပြီး ဘယ်သူမှ မသိနိုင်တဲ့ အချက်ပဲ ဖြစ်ပါတယ်။ အခု ဒီစာကို ရေးနေတဲ့ ဘုန်းဘုန်းကိုယ်တိုင်လည်း ဒုက္ခဆိုတာ ရှိနေမြဲပဲ ဖြစ်ပါတယ်။ ကိုယ့်ဒုက္ခနဲ့ယှဉ်ရင် သူတို့ဒုက္ခတွေက ပိုနေလို့သာ ကိုယ့်ဒုက္ခအကြောင်း မပြောဖြစ်တာ ဖြစ်ပါတယ်။ ပြီးတော့ ဘုန်းဘုန်းတို့ကျတော့ ဘုရားကျေးဇူး၊ တရားကျေးဇူး၊ သံဃာကျေးနဲ့ စာပေကျေးဇူးတွေကြောင့် ဒုက္ခလေးတွေကြုံတိုင်း ဘုရားအား၊ တရားအား၊ သံဃာအားကို အရင်းတည်ကာ သူတော်ကောင်းတွေရဲ့ သူတော်ကောင်းစကားတွေနဲ့ ဖြေဆည်နည်းလေးတွေ သိနေတဲ့အတွက်ကြောင့် ဒုက္ခရှိပေမယ့် ဓမ္မအသိနဲ့ ဒုက္ခမရှိသလို နေထိုင်နိုင်ကြတဲ့ သဘောပဲ ဖြစ်ပါတယ်။
အမှန်တော့ ဘယ်သူတွေ ဘယ်လိုဒုက္ခမျိုးပဲရှိရှိ အမှန်တကယ် ဖြေဆည်ကြည့်သင့်တာက ကိုယ့်ကိုယ်ကို ဓမ္မအသိနဲ့ အကြေအလည် ညှိကြည့်ခြင်းပဲ ဖြစ်ပါတယ်။ ဘာဖြစ်လို့လဲဆိုတော့ ဓမ္မဆိုတဲ့ တရားဟာ အဓမ္မဆိုတဲ့ မတရားတာတွေကို တရားစေနိုင်လို့၊ ဓမ္မဆိုတဲ့အလင်းဟာ အဓမ္မဆိုတဲ့ အမှောင်တွေကို လင်းပြောင်စေလို့၊ ဓမ္မဆိုတဲ့ ချမ်းသာဟာ ဒုက္ခဆိုတဲ့ ဆင်းရဲတွေကို သုခလေးတွေအဖြစ် ထွန်းပြောင်စေလို့ပဲ ဖြစ်ပါတယ်။ တရားဆိုတဲ့ စကားကိုက အမှားတွေကို ခွါထားနိုင်တဲ့ အားတွေကို ပါစေနိုင်တဲ့အတွက်ကြောင့် ဘဝမှာ တရားနဲ့သာ ဖြေတတ်ကြမယ်ဆိုရင် အမှားတွေလည်းကွာပြီး ဒုက္ခတွေကိုပါ ခွါစေနိုင်တော့တာ ဖြစ်ပါတယ်။ တရားအသိနဲ့ အမှားတွေကြည့်ပြီး မမှားအောင် ညှိစေနိုင်တာ ဖြစ်ပါတယ်။ တရားရှိထားရင် အများတွေသိထားတဲ့ အသိတွေထက် အစစအရာရာ အသိသာပြီး ကိုယ့်ကိုယ်ပါ ပြန်သိလာတော့တာ ဖြစ်ပါတယ်။ ကိုယ့်ကိုယ်ကို ပြန်သိလာရင် သတ္တဝါတွေဟာ ဘဝမှာ ဖြစ်ပေါ်လာနေတဲ့ ဒုက္ခတွေအပေါ်မှာလည်း အမှန်သိလာပြီး “ဒါဟာ ဒီလိုအကြောင်းကြောင့် ဒီလိုအကျိုးဖြစ်တာ၊ ဒါရှိနေလို့ ဒါရှိနေတာ” စသဖြင့် အကြောင်းအကျိုးကို ဆင်ခြင်ကာ ဘဝကို ဓမ္မနဲ့ညှိရင်း ဖြေကြည့်သွားတတ်တော့ ဖြစ်ပါတယ်။
သေချာတွေးကြည့်ရင် သတ္တဝါမှန်သမျှ မွေးဖွားလာတာကိုက ဒုက္ခအစုတစ်ခုအဖြစ် ရှိနေကြတာ ဖြစ်ပါတယ်။ မွေးပြီးနောက်မှာလည်း ဘဝတစ်လျှောက် ခန္ဓာဝန်ဒုက္ခတွေနဲ့ လျှောက်နေရပြီး ဘဝအဆုံး သံသရာခရီး တစ်ခုလုံးမှာလည်း ဒုက္ခဆိုတာ ရှိနေကြမှာပဲ ဖြစ်ပါတယ်။ ဒုက္ခဆိုတဲ့ စကားလုံးနဲ့ သတ္တဝါအားလုံးဟာ ယဉ်ပါးနေကြပြီး ဖြစ်ကြပေမယ့် တကယ်ဆင်းရဲတွေ ကြုံတွေ့လာတဲ့အခါ၊ သောကတွေနဲ့ ရင်ဆိုင်လာကြတဲ့ အခါမျိုးမှာ မခံစားနိုင်အောင် ဖြစ်တတ်ကြတာလည်း တရားအသိ မရှိကြသေးတဲ့ သူတွေအတွက် အမှန်တွေပဲ ဖြစ်နေတတ်ပါတယ်။ တစ်ခါတလေ သိပ်ပြီးဒုက္ခကြီးတွေနဲ့ ကြုံတွေ့တဲ့အခါ တရားအသိ ရှိထားတဲ့သူတွေတောင်မှ တုန်လှုပ်တတ်ကြသေးတာဆိုတော့ တရားအသိ ဘာမှမရှိသေးတဲ့ သူတွေအနေနဲ့ ဖြေဆည်မရအောင် ဖြစ်တတ်တယ်ဆိုတာ သဘာဝပဲ ဖြစ်ပါတယ်။
သဘာဝဟာ သဘာဝပဲ ဖြစ်ပေမယ့် အားလုံးဟာ ထာဝရမမြဲတဲ့ အဖြစ်တွေပဲ ဆိုတာကိုတော့ သတိပြုဆင်ခြင်ပြီး ဘဝမှာဒုက္ခတွေနဲ့ ကြုံတဲ့အခါမှာ ဘဝထဲမှာ ဓမ္မလေးတွေ တွဲထားနိုင်အောင်တော့ ကြိုးစားကြရမှာ ဖြစ်ပါတယ်။ ဘဝထဲမှာ ဓမ္မတွဲနိုင်ဖို့အတွက်လည်း တရားတော်လေးတွေကို ဖတ်တတ်တဲ့အကျင့်၊ နာတတ်တဲ့အကျင့်၊ နာပြီးသုံးသပ် ဆင်ခြင်တတ်တဲ့အကျင့်၊ သိရှိလာတဲ့အသိကို ဘဝမှာ လက်တွေ့ အသုံးချတတ်တဲ့ အကျင့်လေးတွေ လုပ်ပေးဖို့တော့ လိုပါတယ်။ အဲဒီလိုအခါမျိုးမှာ တရားနဲ့တော့ ဖြေချင်ပါတယ် ဘယ်လိုဖြေရမှန်းမသိ၊ တရားနဲ့တော့ ပြင်ဆင်ခြင်ပါတယ် ဘယ်လိုပြင်ဆင်ရမှန်းမသိ မဖြစ်ရလေအောင် တရားလေးတွေ အပေါ်စိတ်ဝင်တစား ရှိတတ်တဲ့ အကျင့်လေးတွေလည်း လုပ်ကြည့်ကြရမှာ ဖြစ်ပါတယ်။
တရားဆိုတဲ့ သဘောကလည်း အရသာတစ်မျိုး ဖြစ်တဲ့အပြင် အရသာအားလုံးမှာ တရားအရသာဟာ အကောင်းဆုံး ဖြစ်တဲ့အတွက် တရားတော်အပေါ်မှာ စိတ်ဝင်တစားနဲ့ ဖတ်ရှုနာယူ မှတ်သားကြမယ်ဆိုရင် တရားတွေကို နာယူမှတ်သားချင်တဲ့ စိတ်လေးတွေ ကိုယ့်သန္တာန်မှာ တဖြည်းဖြည်း တိုးပွားလာတတ်ပါတယ်။ စိတ်ဆိုတဲ့ သဘောက မကောင်းတဲ့အလုပ်တွေမှာဆို မတိုက်တွန်းရပဲ လုပ်တတ်ပေမယ့် ကောင်းတဲ့ အလုပ်တွေမှာတော့ သီးသန့်ကိုအားယူပြီး လုပ်ကြည့်မှ ရတတ်တဲ့ သဘောရှိတဲ့အတွက် တရားနာတတ်တဲ့ အကျင့်လေးကိုလည်း သီးသန့်အနေနဲ့ လုပ်ကြည့်သင့်ကြပါတယ်။ ဒီလိုအလေ့အကျင့်လေးတွေဟာ လုပ်ပါများလာရင် ကိုယ့်သန္တာန်မှာ တရားအသိလေးတွေ တဖြည်းဖြည်း တိုးပွားလာပြီး ဘဝမှာ အခက်အခဲတွေ ကြုံတဲ့အခါ၊ ဒုက္ခလေးတွေ ကြုံတဲ့အခါ ကိုယ့်သန္တာန်မှာ အလိုလိုပဲ တရားနဲ့ ဖြေတတ်တဲ့ အကျင့်လေးတွေ ရလာမှာ ဖြစ်ပါတယ်။ တရားများများ နာယူထားလေလေ၊ တရားအသိများများ ရှိထားလေလေ အဲဒိအသိတွေက ကိုယ့်ဘဝမှာ ကြုံလာရမယ့် ဆင်းရဲတွေ၊ ကြုံလာရမယ့် လောကဓံတွေကို ခံနိုင်ရည်ရှိအောင် သင့်လျော်တဲ့ ဖြေဆည်မှုတွေ ပေးနေတော့တာ ဖြစ်ပါတယ်။
မြတ်စွာဘုရားရှင်ရဲ့ တရားတော်တွေဟာ သတ္တဝါတိုင်း ကြုံတွေ့ရတတ်တဲ့ ကိုယ်ဆင်းရဲခြင်း ကာယိကဒုက္ခ၊ စိတ်ဆင်းရဲခြင်း စေတသိကဒုက္ခတွေကို သက်သောင့်သက်သာဖြစ်အောင်၊ ဒီဒုက္ခတွေ ထာဝရ ပေါ်မလာတော့အောင် လမ်းညွှန်ပေးထားတဲ့ တရားတော်တွေပဲ ဖြစ်တဲ့အတွက် ကိုယ်ဆင်းရဲခြင်းနဲ့ပဲ ဖြစ်ဖြစ်၊ စိတ်ဆင်းရဲခြင်းနဲ့ပဲဖြစ်ဖြစ် ကြုံတွေ့ကြတဲ့အခါ ဘုရားရှင်ရဲ့ တရားရေအေး အမြိုက်ဆေးကိုပဲ သောက်သုံးပြီး ဖြေဆည်ကြရမှာ ဖြစ်ပါတယ်။ အထူးသဖြင့် စေတသိကဒုက္ခဆိုတဲ့ စိတ်ဆင်းရဲခြင်းတွေနဲ့ ကြုံတွေ့တဲ့အခါမှာ စိတ်အညစ်အကြေး စိတ်နဲ့ဆေးတတ်တဲ့ အကျင့်လေးတွေနဲ့ ကိုယ့်စိတ်ကိုမြင်အောင်ကြည့်ပြီး ကိုယ့်မှာအကုသိုလ် ဖြစ်စေမယ့်အရာတွေဆိုရင် အမြန်ဆုံးထုတ်နိုင်အောင်ကြိုးစား၊ ကုသိုလ်ဖြစ်စေမယ့် အရာတွေဆိုရင် အကြိမ်ကြိမ် တိုးပွားအောင် ကြိုးစားရင်း တရားရေအေး အမြိုက်ဆေးကို တိုက်ကျွေးကြည့်ကြရမှာ ဖြစ်ပါတယ်။ ကာယိကဒုက္ခဆိုတဲ့ ကိုယ်ဆင်းရဲခြင်းကတော့ ရုပ်တရားရလာရင် ရုပ်ဖောက်ပြန်မှုဆိုတာလည်း ရှိနေမှာဖြစ်ပြီး ရုပ်ဖောက်ပြန်ခြင်းဟာ ရုပ်ဆင်းရဲခြင်းပဲ ဖြစ်တဲ့အတွက် ဒီရုပ်ဝေဒနာအပေါ် ခံစားချက်ကို ရှုမြင်တတ်တဲ့ အကျင့်လေးတွေနဲ့ ဖြေဆည်နိုင်ရင် နာနေတာကတခြား၊ နာနေတာကို သိနေတာကတခြား စသဖြင့် ရုပ်နာမ်သဘောကို သီးသန့်မြင်ပြီး သူ့အလိုလို ခံနိုင်ရည်ရှိကာ ဖြေဆည်လာနိုင်ကြမှာပဲ ဖြစ်ပါတယ်။ ဒါဟာ ကိုယ်စိတ်ဆင်းရဲခြင်းတွေ ဖြစ်တဲ့အခါ တရားနဲ့ ဖြေဆည်ကြည့်တဲ့ သဘောမျိုးပဲ ဖြစ်ပါတယ်။
တကယ်တော့ ဘဝမှာ တရားနဲ့ ဖြေတတ်တဲ့ အကျင့်လေးတွေနဲ့ နေထိုင်တတ်ဖို့ဆိုတာ သီးသန့်ဟန်ဆောင်ပြီး တရားအလုပ် လုပ်နေရမယ့် သဘောမျိုး မဟုတ်ပါဘူး။ တရားအသိ များများရှိအောင် ကြိုးစားပြီး ကိုယ့်ကိုယ်ကို ဆင်ခြင်တတ်တဲ့ အကျင့်၊ ကိုယ့်ကိုယ်ကို မြင်တတ်တဲ့ အကျင့်၊ ကိုယ်ကိုယ်ကို ပြင်တတ်တဲ့ အကျင့်လေးတွေ ရှိအောင် ကြိုးစားနေထိုင်နိုင်ရင်ကိုပဲ ဘဝမှာ ကိုယ့်ကိုယ်ကို တရားနဲ့ ဖြေတတ်သွားတော့တာ ဖြစ်ပါတယ်။ မမေ့မလျော့တဲ့ သတိနဲ့ တရားအသိ များများရှိထားတဲ့ ဘုရားတပည့် တစ်ယောက်ဟာ ဘဝမှာ ဘယ်လို ဒုက္ခမျိုးပဲလာလာ အဲဒီဒုက္ခတွေကို ဘုရားစကားတော်နဲ့ ဖြေဆည်သွားတတ်တော့တာ ဖြစ်ပါတယ်။ တရားအသိရှိပြီး အဲဒီအသိနောက်ကို အကျင့်လိုက်ထားတဲ့သူဟာ ကိုယ့်ကိုယ်ကိုလည်း သက်သောင့်သက်သာ ဖြစ်အောင် ဖြေဆည်သွားတတ်သလို သူတပါးအပေါ်မှာလည်း အကုသိုလ် အပြစ်မဖြစ်အောင် ဖြေကြည့်ပေးသွားတော့တာ ဖြစ်ပါတယ်။
တစ်လောက နိုင်ငံခြားမှာရောက်နေတဲ့ အသိဒကာတစ်ယောက်က လျှောက်ဖူးပါတယ်။ “အရှင်ဘုရား အခုတလော တပည့်တော် သိသိသာသာ ပြောင်းလဲလာတာကို သတိပြုမိလာပါတယ်ဘုရား၊ တရားစာတွေဖတ်၊ တရားတွေနာ၊ မေတ္တာများများပွား၊ တရားလေးတွေ ထိုင်လာတတ်တဲ့ တပည့်တော်အနေနဲ့ အခုနောက်ပိုင်းမှာ တပည့်တော်နဲ့ ပတ်သက်တဲ့ အကောင်းအဆိုး၊ အတက်အကျ အနိမ့်အမြင့် လောကဓံတွေကို ခံနိုင်ရည် ရှိလာတာကို လက်တွေ့သိလာရပါတယ်ဘုရား၊ တရားအလုပ်ကို မလုပ်ဖြစ်ခင်တုန်းကဆိုရင် တပည့်တော်မှာ ထစ်ကနဲဆို ဒေါသဖြစ်လိုက်၊ ထစ်ကနဲဆို စိတ်ဆိုးစိတ်တိုလိုက်၊ ဘာလေးဖြစ်ဖြစ် လိုက်ခံစားလိုက်နဲ့ ခဏခဏ ဒုက္ခဖြစ်တတ်ပေမယ့် အခုဆိုရင် ဒီအတိုက်အခိုက်တွေ၊ ဒီလောကဓံတွေ ဖြစ်လာမယ်ဆိုတာ သိနေတာတောင် တုန်လှုပ်မှု မရှိတော့တာကို သတိ ထားမိလာပါတယ်ဘုရား၊ တစ်လောကတောင် အလုပ်ရှင်က အလုပ်ဖြုတ်တော့မယ်လို့ ဆိုတော့ အဲဒါကို သိသိနဲ့ ဘယ်လိုမှ မခံစားမိဘဲ တရားသဘောနဲ့ ဖြေဆည်သွားတတ်တာကို တပည့်တော် ကျေနပ်နေမိပါတယ်ဘုရား” စသဖြင့် သူ့ရဲ့ တရားနဲ့ ဖြေလာတတ်တဲ့ လက်တွေ့ဘဝ အခြေအနေကို ပြောဆိုလျှောက်ထားဖူးပါတယ်။
ဟုတ်ပါတယ်။ ဒါဟာ တရားတော်ကပေးတဲ့ လက်တွေ့ကျတဲ့ ဖြေဆည်ရာပဲ ဖြစ်ပါတယ်။ တရားကိုစောင့်တဲ့သူကို တရားက ပြန်စောင့်တယ်ဆိုသလိုပဲ တရားအသိနဲ့နေ၊ တရားအလုပ်နဲ့ နေတဲ့သူတွေကို တရားက အကောင်းဆုံး ပြန်လည်စောင့်ရှောက်မှုကိုပေးရင်း အကောင်းဆုံး ဖြေဆည်ရာကိုလည်း ပေးနေတတ်တာ ဖြစ်ပါတယ်။ ဘဝမှာ အခက်အခဲတွေကို သီးသန့်ဖြေဆည်ဖို့ တရားအလုပ်ကို လုပ်တာမဟုတ်ပေမယ့် တရားအလုပ်ကို လုပ်လာတဲ့သူတွေကို တရားက အကောင်းဆုံး ဖြေဆည်မှုကို ပေးနေမှာ အသေအချာပဲ ဖြစ်ပါတယ်။
ဆိုလိုတာက သတ္တဝါတိုင်း သတ္တဝါတိုင်းဟာ ဘဝမှာ အကောင်းအဆိုး လောကဓံတွေနဲ့ ကြုံတွေ့ရတတ်ပြီး ဒုက္ခပေါင်းစုံကိုလည်း ခံစားရတတ်တာ ဖြစ်တဲ့အတွက် အဲဒီလောကဓံတွေ၊ ဆင်းရဲဒုက္ခတွေနဲ့ ကြုံတွေ့တဲ့အခါ မတုန်မလှုပ် ခံနိုင်ရည်ရှိဖို့နဲ့ သက်သောင့်သက်သာ ဖြစ်အောင် နေထိုင်နိုင်ဖိုိ့အတွက် အကောင်းဆုံး ဖြေဆည်ရာဆိုတာ တရားကလွဲပြီး တခြားဘာမှ မရှိကြောင်း၊ တရားနဲ့ ဖြေဆည်ခြင်းကသာ အကောင်းဆုံး ဖြေဆည်ရာဖြစ်ကြောင်း၊ အဲဒီလို တရားနဲ့ဖြေတတ်ဖို့အတွက် တရားအသိလည်း ရှိဖို့လိုကြောင်း၊ တရားအသိ ရှိဖို့အတွက် တရားစာဖတ်ခြင်း၊ တရားနာခြင်း၊ တရားအလုပ်လုပ်ခြင်းတို့ကို ပြုလုပ်ကြရမှာ ဖြစ်ကြောင်း၊ အဲဒီလို တရားအလုပ်ကို လုပ်ထားနိုင်သူတွေဆိုရင် ဘဝမှာ ဘယ်လိုဆင်းရဲ ဒုက္ခမျိုးပဲလာလာ ကိုယ့်ကိုယ်ကို တရားနဲ့ ဖြေဆည်နိုင်သွားမှာ ဖြစ်ကြောင်း စသဖြင့် ဆိုလိုတာ ဖြစ်ပါတယ်။
ဒါကြောင့် ဘဝမှာ အကျမနာဘဲ အလှဖြာလိုသူများ အနေနဲ့ တရားအသိ များများရှိစေဖို့ တရားအလုပ်များများ လုပ်ရင်း တရားကပေးတဲ့ အသိတွေနဲ့ ကြုံလာသမျှ ဒုက္ခတွေကို တရားနဲ့ဖြေကာ ဘဝထဲမှာ ဓမ္မတွဲနိုင်အောင် တရားစာဖတ်ခြင်း၊ တရားနာခြင်း၊ တရားဆွေးနွေးခြင်း၊ တရားထိုင်ခြင်း စတဲ့အလုပ်တွေကို အရွယ်မရွေး စွမ်းနိုင်သမျှ ကြိုးစားအားထုတ်ကြည့်ကြဖို့ အလေးအနက် တိုက်တွန်းရင်း ဘာပဲဖြစ်ဖြစ် တရားနဲ့သာ ဖြေကြည့်ကြပါစို့လို့ အသိပေးစကား ပါးလိုက်ရပါတယ်။
0 မှတ်ချက်များ (...ရေးရန်):
Post a Comment