ဝါတွင်းသုံးလကာလပတ်လုံး အင်တာနက် စာမျက်နှာပေါ်တွင် စာရေးခြင်းကိစ္စ အဆက်ပြတ်သွားခဲ့၏။ အဆက်ပြတ်ခြင်းဆိုသည်ထက် အဆက်ဖြတ်ထားခြင်း ဖြစ်၏။ ကိုရီးယားနိုင်ငံရှိ ကျောင်းကိစ္စအဝဝနှင့် မြန်မာပြည်ရှိ ကျောင်းကိစ္စများ၊ ပရဟိတ ပညာဒါန လုပ်ငန်းများ အားလုံးကို ဆိုင်ရာတာဝန်ခံများနှင့် လွှဲအပ်ကာ မုံရွာတစ်ဖက်ကမ်း၊ ချင်းတွင်းတံတား အနီးရှိ ရွှေတောင်ဦး လယ်တီပဿနာရိပ်သာတွင် လယ်တီဆရာတော်ကြီး၏ နည်းနာနိဿယကို အရယူကာ ဝိပဿနာကျင့်စဉ်နှင့် ဓုတင်အကျင့်တို့ကို အားထုတ်ဖြစ်ခဲ့၏။ ဝါဆိုလပြည့်နေ့မှ ဝါခေါင်လပြည့်နေ့အထိ (၁)လတိတိကို ရွှေတောင်ဦး လယ်တီရိပ်သာတွင် အားထုတ်ဖြစ်ခဲ့ပြီး သီတင်းကျွတ်လပြည့်နေ့အထိ ကျန်သည့်အချိန်များကိုကား ရန်ကုန်ကျောင်းမှာပင် ဓုတင်နှင့် ဝိပဿနာအလုပ်ကို ဆက်လက်၍ အားထုတ်ဖြစ်ခဲ့၏။ ရုပ်ပိုင်းဆိုင်ရာ ပြည့်စုံမှုများ၊ ပစ္စည်းလေးပါး လာဘ်လာဘများမှ ရုန်းထွက်ကာ ထိန်းသိမ်းရန် ခက်ခဲလှသည့် စိတ်အစဉ်နှင့် ခြိုးခြံစွာကျင့်ရသည့် ဓုတင်အကျင့်တို့ကို သည်းခံ၍ အားထုတ်ဖြစ်ခဲ့၏။ ရုပ်ပိုင်းဆိုင်ရာ၏ တဒင်္ဂပြည့်စုံမှုကို ဓမ္မအေးရိပ်ဖြင့် လဲလှယ်ခဲ့ခြင်း ဖြစ်၏။
စင်စစ် ဤကိစ္စသည် လူသိရှင်ကြား ပြောရမည့် ကိစ္စမဟုတ်လှပေ။ သို့သော် သူ့အတိုင်းအတာနှင့်သူ အနှောင်အဖွဲ့များမှ ရုန်းထွက်ရန် ခက်ခဲမှုများ ရှိနေသည့်ကြားက အားလုံးကို အဆက်ဖြတ်ကာ ရုန်းထွက်ဖြစ်ခဲ့သည့်အပေါ် ပီတိပွားနိုင်စေရန် အသိမျှပေးခြင်း သက်သက်သာ ဖြစ်ပါ၏။ အတွယ်များကိုဖယ်ကာ အတိုင်းအတာတစ်ခုအထိ ဓမ္မအရိပ်တွင် ခိုလှုံဖြစ်ခဲ့မှုအပေါ် သာဓုခေါ်နိုင်ရန်နှင့် မိမိတို့လည်း တစ်ချိန်ချိန်တွင် ရုန်းထွက်နိုင်အောင် ကြိုးစားသင့်ကြောင်း တိုက်တွန်းလိုရင်း ဖြစ်၏။
မှန်၏။ ဘဝတွင် လူတိုင်းလူတိုင်း ကြာလျှင်ပို၍ပင် သံယောဇဉ် တွယ်ဖွယ်ရာများနှင့်သာ နိဂုံးချုပ်သွားတတ်သဖြင့် ထိုအတွယ်များကို အခိုက်အတန့်ဖြစ်စေ ပယ်ခွာ၍ တရားအလုပ် အားထုတ်ဖြစ်ရန် ရုန်းထွက်သင့်ကြ၏။ “ငါမရှိရင် မဖြစ်ပါဘူး”ဟူသော ခံယူချက်အတွေးကိုဖယ်ကာ “ငါမရှိလည်း သူ့ဟာနဲ့သူတော့ ဖြစ်သွားတာပဲ” ဟူသည့် အမြင်ဖြင့် သံယောဇဉ်မှန်သမျှ သူမတွယ်ခင် ကိုယ်ကအရင် ဖယ်နိုင်အောင် ကြိုးစားသင့်ကြ၏။ အလုပ်သံယောဇဉ်၊ သားသမီး သံယောဇဉ်၊ ဒကာ၊ဒကာမ သံယောဇဉ်၊ အိမ်သံယောဇဉ်၊ ကျောင်းသံယောဇဉ်များသည် ကြာလာသည့်နှင့်အမျှ ပို၍ပင်တွယ်လာတတ်ပြီး ရုန်းထွက်ရန် ခက်တတ်သဖြင့် အတွယ်မများခင် ဓမ္မအားအင်နှင့် တရားခင်နိုင်အောင် ကြိုးစားသင့်ကြ၏။ ဇနီးမယား၊ သမီးသားနှင့် စည်းစိမ်ဥစ္စာ၊ ကျောင်းအိမ်ရာသည် မိမိက မည်မျှပင် တွယ်နေပါသော်လည်း အချိန်တန်လျှင် အားလုံးကိုထား၍ ဘဝခရီး သွားကြရမည်သာ ဖြစ်သဖြင့် သူမခွဲခင် ကိုယ်အရင်ခွဲကာ ဘဝအတွက် ဓမ္မဖက်နိုင်အောင် အတွယ်များမှ ရုန်းထွက်သင့်ကြ၏။
ထို့ကြောင့် ဓမ္မမိတ်ဆွေများအား တိုက်တွန်းပါ၏။ သံယောဇဉ်အတွယ် အမျိုးမျိုးသည် ကိုယ်ကမဖယ်လျှင် သူက တွယ်နေမည်သာ ဖြစ်ပြီး ထိုအတွယ်များသည် ဘဝခရီးအတွက် အကောင်းမဆက်နိုင်သဖြင့် အချိန်မနှောင်းခင် စိတ်ကောင်းဝင်ပြီး ဘဝအတွက် ဓမ္မဘက်သို့ ဦးတည်လှမ်းတက် ခရီးဆက်နိုင်ဖို့ မနှေးအမြန် ရုန်းထွက်ကြရန် မေတ္တာရှေ့ထား တိုက်တွန်းစကား ပါးလိုက်ရပါသည်။
မေတ္တာဖြင့်
မနာပဒါယီ အရှင်ဝိစိတ္တ
