မရှိခိုးနိုး မလှစုန်းနိုး…

“ဟုတ်ပါတယ် ဘုန်းဘုန်း… တပည့်တော်တို့အဖြစ်က တိုင်းပြည်ကမွဲပြီး အစစအရာရာ နောက်ကျနေတော့ ဘာလေးပဲလုပ်လုပ် ဟေ့…ဟေ့ အဲလိုမလုပ်ရဘူး၊ အဲလိုမပြောရဘူး၊ မင်းတို့ဆီမှာ ဒါမျိုးရှိတာမဟုတ်ဘူးဆိုပြီး ဟိုဟာမလုပ်ဖို့ ဒါမလုပ်ဖို့ အထင်သေး အမြင်သေးတဲ့ သဘောတွေနဲ့ အပြောခံနေရတဲ့ အဖြစ်ပါပဲ ဘုရား…”ဆိုပြီး ကျောင်းမှာခဏခဏ ကြုံတွေ့နေရတဲ့ သူ့ရဲ့ခံစားချက်ကို ရင်ဖွင့်သွားတဲ့ ကျောင်းသားတစ်ယောက်ရဲ့ စကားတွေကို ပြန်လည်ကြားယောင်ရင်း “မရှိခိုးနိုး မလှစုန်းနိုး”ဆိုတဲ့ မြန်မာစကားပုံလေးကို သွားပြီးသတိရမိပါတယ်။ ကိုယ့်မှာမရှိရင် သူခိုးလိုလို အထင်ခံရပြီး ရုပ်အဆင်းက မလှရင်လည်း စုန်းလိုလို ကဝေလိုလို အထင်ခံရတတ်ကြောင်း ဖော်ညွှန်းထားတဲ့ ဒီစကားပုံလေးက လက်တွေ့ဘ၀ ရောက်တဲ့နိုင်ငံတိုင်းမှာ အနှိမ်ခံ အထင်သေးခံ ဖြစ်နေရတဲ့ မြန်မာနိုင်ငံသားများကို တိုက်ရိုက်ပြောနေသလို ဖြစ်နေပါတယ်။

ဟုတ်ပါတယ်။ မွဲပြီဆိုရင် လွဲနေတယ်လို့ အထင်ခံနေရတဲ့ လူမွဲတွေရဲ့ဘ၀ဟာ ဘယ်မှာနေနေ ဘယ်နေရာရောက်ရောက် အနှိမ်ခံ၊ အထင်သေးခံနေရတဲ့ အဖြစ်ပါ။ လွဲတတ်တဲ့သူချင်းအတူတူ လူချမ်းသာတွေ လွဲတဲ့အခါ အပြစ်မမြင် ဖြစ်တတ်တယ်လို့ ထင်နေကြပေမယ့် လူမွဲတွေ လွဲရင်တော့ ကွဲပြီသာမှတ်ပေတော့လို့ ဆိုရလောက်အောင် ၀ိုင်းဝန်းပြောဆိုကာ အမျိုမျိုးနှိမ်ကြတော့တာပါပဲ။ ပိုဆိုးတာက မွဲတဲ့နိုင်ငံ၊ နိုင်ငံရေး စီးပွားရေ မငြိမ်တဲ့နိုင်ငံက လူတွေဆိုရင် အားပေးမှုနဲ့ ဖေးမပေးကြဖို့ စိတ်မကူးဘဲ မွဲတာကိုပဲ အပြစ်တစ်ခုအနေနဲ့ “မင်းတို့ဆီမှာဆို ဒါမျိုးရှိတာမဟုတ်ဘူး၊ မင်းတို့ ဒါမျိုးသုံးနိုင်မှာ မဟုတ်ဘူး၊ မင်းတို့အနေနဲ့ ဒါမျိုးတွေ မလုပ်သင့်ဘူး…” စတဲ့ အပြောအဆိုတွေ၊ အထင်သေး အမြင်သေးတဲ့ အမူအရာတွေနဲ့ အနှိမ်ခံနေရတဲ့ အဖြစ်တွေပါ။

တစ်လောကပဲ ဒကာလေးတစ်ယောက် ဈေးဝယ်သွားရင်း ကြုံရတဲ့ သူ့အဖြစ်ကို ပြောပြပါသေးတယ်။ “ဒီနိုင်ငံမှာ ဈေးရောင်းတဲ့ တစ်ချို့အဒေါ်ကြီးတွေ၊ အဖွားကြီးတွေက နိုင်ငံခြားသား အလုပ်သမားတွေဆို ကောင်းကောင်း မဆက်ဆံချင်ကြဘူးဘုရား၊ ဈေးမေးတာတောင် မဖြေချင်သလို ဖြေချင်သလို လုပ်တတ်ကြတယ်၊ အ၀တ်အစား တောက်တောက်ပြောင်ပြောင် မရှိတာကိုပဲ အထင်သေးတဲ့ အမြင်နဲ့ နိုင်ငံခြားသားတွေ ဈေးလာဝယ်ရင် သိပ်ပြီးအဖက်မလုပ်ချင်ကြဘူး၊ တပည့်တော်ကိုယ်တိုင် လွန်ခဲ့တဲ့ နှစ်ပတ်လောက်က ဈေးထဲသွားပြီး ပစ္စည်းတစ်ခု ဈေးသွားမေးတာ ဈေးသည်အဒေါ်ကြီးက လူကြည့်ပြီး ဈေးမပြောဘဲ ‘ဈေးကြီးတယ်’လို့ပြောပြီး တစ်ဘက်ကို လှည့်သွားတယ်ဘုရား၊ ဒါနဲ့ တပည့်တော်လည်း အမြင်ကပ်တာနဲ့ အဲဒီလို ပုံစံတူ ပစ္စည်းကိုပဲ သူ့ဆိုင်ဘေးကဆိုင်မှာ တမင်အရွဲ့တိုက်ပြီး အများကြီး ၀ယ်ပြလိုက်တယ်၊ ခုဆိုရင် တပည့်တော်တို့သွားရင် အရင်ပုံစံမဟုတ်တော့ဘဲ ပြာပြာသလဲ ဘာယူမလဲ၊ ဘယ်လောက်ဖိုးလဲ လုပ်လာတော့တယ်ဘုရား..” စသဖြင့် သူ့အတွေ့အကြုံကို ပြောပြလို့ သိလိုက်ရပါတယ်။ သူပြောတာတွေ နားထောင်ပြီး “အင်း… ဒါကြောင့်နေမှာ ဒို့လူမျိုးတွေ ၀တ်လိုက်ဝယ်လိုက်ရင် ကောင်းပေ့၊ ဈေးကြီးပေ့ ဆိုတာတွေချည်းပဲ..”လို့ ဟာသနှောပြီး ပြောဖြစ်ပါသေးတယ်။

ဘာပဲဖြစ်ဖြစ် သေချာတာကတော့ မရှိရင် မွဲရင် အဖတ်မလုပ်ချင်ကြသလို ဟိုထင်ဒီထင် ထင်ခံရတယ်ဆိုတာ အသေအချာပဲ ဖြစ်ပါတယ်။ ရွာတစ်ရွာမှာ ပစ္စည်းပျောက်ရင် အဲဒီရွာက အမွဲဆုံးဆိုတဲ့ သာဂိတစ်ယောက် သွားစရာနေရာမရှိဖြစ်ပြီး ဟိုပုန်းဒီပုန်း ပုန်းနေရတဲ့ အဖြစ်လို ဘယ်သူက ဘာပဲပျောက်ပျောက် “ဒါ သာဂိလက်ချက်ပဲ ဖြစ်မှာ”ဆိုတဲ့ ရိုးမယ်ဖွဲမှုတွေနဲ့ အနှိပ်ခံရတတ်တဲ့ လူမွဲတွေရဲ့ဘ၀ဟာ မရှိတော့လည်း သူခိုးလို့ အထင်ခံနေရတဲ့ အဖြစ်ပါ။

ရှိပါစေတော့။ မွဲလို့ အနှိပ်ခံရတာတော့ နိုင်ငံခြားရောက်မှ မဟုတ်ပါဘူး။ ကိုယ့်နိုင်ငံမှာနေလည်း အနှိမ်ခံနေရတာပါပဲ။ တစ်ခါတစ်လေ ကိုယ့်လူမျိုး အချင်းချင်းကတောင် ပိုဆိုးနေပါသေးတယ်။ မွဲပြီဆိုရင် လူမပြောနဲ့ တိရိစ္ဆာန်တွေကတောင် အိမ်ရှေ့မလာကြဘူး ဆိုသလို မရှိတဲ့ သူတွေရဲ့ ဘ၀ဟာ အစစအရာရာ မျက်နှာငယ်ရတဲ့ ဘ၀ဆိုတာ လူမွဲအများစုဖြစ်တဲ့ မြန်မာနိုင်ငံသားတွေက ပိုသိကြမှာပါ။ လူမွဲတွေရဲ့ ဘ၀ဟာ ငွေမရှိတော့ ဗိုလ်ချုပ်အောင်ဆန်း ပြောသလို ဟိုလူ့မြင်လည်း မျက်နှာချိုသွေးရ၊ ဒီလူ့မြင်လည်း မျက်နှာချိုသွေးနေရတဲ့ ဘ၀ပါ။ မွဲတဲ့အခါကျတော့ သူဋ္ဌေးကလည်း သူ့ပစ္စည်းပျောက်ရင် ကိုယ်ပဲယူသလိုလို၊ အာဏာပိုင်ကလည်း အမှုဖြစ်ရင် ကိုယ်ပဲကျူးလွန်သလိုလို အထင်ခံရတတ်တဲ့အပြင် ဒီကြားထဲ ရုပ်ပါဆိုးပြီဆိုရင်တော့ အိမ်တစ်အိမ်မှာ သူ့ကလေး သူ့ဖာသာသူ အစားမှာတာကိုပဲ ကိုယ့်ရုပ်ကြည့်ပြီး ကိုယ်ကပဲ စုန်းအတတ်နဲ့ ပြုစားသလိုလို အထင်ခံရ ပြန်ပါတယ်။ ဒါကြောင့်လည်း မြန်မာစကားပုံက မရှိခိုးနိုး မလှစုန်းနိုးလို့ ဆိုတာဖြစ်မှာပါ။

ဘာပဲဖြစ်ဖြစ် ကိုယ့်ကံအကျိုးပေး မကောင်းလို့ မွဲလာခဲ့ရတဲ့ အဖြစ်မှာ ဒီလိုမွဲတဲ့အတွက် ထင်ခံရတဲ့ အပြစ်တွေ လိုက်ပြောနေလို့ကတော့ ပြီးမှာမဟုတ်တော့ပါဘူး။ မွဲလို့ဖြစ်ရတဲ့ ဆိုးကျိုးဟာ အတိတ်က ကိုယ်လုပ်ခဲ့တဲ့ ကံရဲ့ တန်ပြန်သက်ရောက်မှုလို့ သဘောထားပြီး လက်ရှိမွဲနေတဲ့ ဘ၀ကနေ နောင်ကျင်လည်ရမယ့် ဘ၀တွေအထိ ဒီသက်ရောက်မှုတွေ ပါမသွားအောင်ပဲ ကြိုးစားရတော့မှာပါ။ လူမွဲပေမယ့် စိတ်မမွဲအောင်၊ လူမွဲပေမယ့် စေတနာ မမွဲအောင်၊ လူမွဲပေမယ့် သဒ္ဓါမမွဲအောင်၊ လူမွဲပေမယ့် အကျင့်မမွဲအောင်ပဲ အတတ်နိုင်ဆုံး ကြိုးစားကြရမှာ ဖြစ်ပါတယ်။ ဘယ်သူတွေ ဘယ်လိုထင်ထင် ကိုယ်ရဲ့အသွင်တွေ မမွဲဖို့ပဲ ကြိုးစားရမှာ ဖြစ်ပါတယ်။ အကျင့်မွဲရင် အသွင်မွဲတတ်တဲ့အတွက် အသွင်မမွဲအောင် အကျင့်မမွဲဖို့ သတိပြုရမှာ ဖြစ်ပါတယ်။ မွဲလို့ အထင်သေးခံ၊ အနှိမ်ခံနေရတဲ့ ဘ၀မှာ အကျင့်ကောင်းအောင် ကြိုးစားပြီး သူတို့မလုပ်နိုင်တဲ့ အကျင့်လေးတွေနဲ့ပဲ အနိုင်ယူနိုင်အောင် အားထုတ်ရမှာ ဖြစ်ပါတယ်။

ဘုန်းဘုန်းရဲ့ ကိုယ်တွေ့အနေနဲ့ ပြောရရင် ဘုန်းဘုန်းတို့လည်း နိုင်ငံခြားရောက်လာပြီး တက္ကသိုလ်တစ်ခုမှာ ကျောင်းတက်နေတုန်းက ဘုန်းကြီးဆိုတဲ့ သဘောမျိုးနဲ့ မကြည့်ဘဲ မွဲတဲ့နိုင်ငံက ကျောင်းလာတက်တဲ့ နိုင်ငံခြားသား ကျောင်းသားအဖြစ်နဲ့ ကြည့်ကာ ပြောဆိုအနှိမ်ခံ ခဲ့ရတာတွေ ရှိခဲ့ပါတယ်။ ဒါပေမယ့် ကျောင်းသားချင်းတူပေမယ့် သူတို့နိုင်ငံမှာရှိတဲ့ ကျောင်းသားဘုန်းကြီးတွေနဲ့ မတူအောင် နေပြလိုက်တော့ နောက်ပိုင်းသူတို့ကိုယ်တိုင် တလေးတစားဖြစ်လာ၊ သူတို့လိုချင်တာတွေ နည်းခံလေ့လာလာ၊ သူတို့ရဲ့ စိတ်အစဉ်ကို အကျင့်တရားတွေနဲ့ ကုစားပေးတဲ့ ဆရာအဖြစ် တင်လာတဲ့အထိ ဖြစ်လာခဲ့ရပါတယ်။ ဒီလိုဖြစ်ဖို့ သူတို့ရှေ့မှာ အထင်ကြီးအောင် တမင်နေပြတာတော့ မဟုတ်ပါဘူး။ ဘုန်းကြီးတစ်ပါးအနေနဲ့ လိုက်နာကျင့်သုံးရမယ့် ဗုဒ္ဓဓမ္မ ၀ိနယတွေကို ဘယ်နေရာရောက်ရောက် လိုက်နာကျင့်သုံးနေတဲ့အတွက် ရရှိလာတဲ့ တန်ပြန်သက်ရောက်မှုကောင်းပဲ ဖြစ်ပါတယ်။ ဒါဟာ လူမွဲပေမယ့် အကျင့်မမွဲအောင် နေပြလိုက်ခြင်းရဲ့ လက်တွေ့အကျိုးပဲ ဖြစ်ပါတယ်။ လူမွဲပေမယ့် စိတ်မမွဲအောင် သတိဆောင်ရခြင်းရဲ့ မျက်မှောက် အကျိုးပဲ ဖြစ်ပါတယ်။

အဓိကကတော့ လူပဲဖြစ်ဖြစ်၊ ဘုန်းကြီးပဲ ဖြစ်ဖြစ် ရုပ်ပိုင်းဆိုင်ရာ မွဲပေမယ့် စိတ်ပိုင်းဆိုင်ရာ မမွဲအောင် ကြိုးစားကြဖို့က အဓိကပဲ ဖြစ်ပါတယ်။ မွဲနေတဲ့ဘ၀မှာ ချမ်းသာသူတွေ၊ အာဏာရှိသူတွေ၊ ရာထူးဂုဏ်ရှိသူတွေ၊ အထက်တန်းကျတယ်လို့ ထင်နေသူတွေကို အနိုင်ယူနိုင်တာက လူမွဲပေမယ့် စိတ်မမွဲအောင်၊ ကိုယ်ကျင့်တရား မမွဲအောင် ကြိုးစားနေထိုင်ခြင်း တစ်ခုပဲ ရှိပါတယ်။ အထူးသဖြင့် ကိုယ်ကျင့်သီလ မမွဲဖို့ အရေးကြီးပါတယ်။ ကိုယ်ကျင့်သီလ လုံနေမယ်၊ ကိုယ်ကျင့်တရား ကောင်းနေမယ်ဆိုရင် လူမွဲပေမယ့် မကောင်းသတင်းမထွက်ဘဲ ကောင်းသတင်းနဲ့ ကျော်စောတတ်ပါတယ်။ လူမွဲပေမယ့် ကိုယ်ကျင့်မမွဲရင် ဘယ်လိုပရိတ်သတ်ထဲမဆို မကြောက်မရွံ့ ၀င်ရဲပါတယ်။ လူမွဲပေမယ့် အကျင့်မမွဲရင် သေခါနီးမှာ သတိလက်လွတ်မဖြစ်ဘဲ သေပြီးနောက်မှာလည်း ကောင်းတဲ့သုဂတိဘ၀မှာ ပြန်ဖြစ်ရပါတယ်။ ဒါကြောင့် ဘ၀ပေးကံကြောင့် မွဲနေရတဲ့ ဘ၀မှာ ဘယ်သူတွေ ဘယ်လောက်ပဲ အထင်သေး အမြင်သေးနေကြပေမယ့် ကိုယ့်ကိုယ်ကို အထင်မသေးဘဲ သူတို့ထက်သာအောင် အကျင့်မမွဲဖို့ ကြိုးစားရမှာ ဖြစ်တယ်လို့ ဆိုခြင်းဖြစ်ပါတယ်။

ထားပါတော့။ ဒီနေရာမှာ ဘုန်းဘုန်းအဓိကပြောချင်တာက လောကကြီးမှာ မရှိရင် သူခိုးလို့ အထင်ခံရတတ်၊ မလှရင် စုန်းလို့အထင်ခံရတတ်ပေမယ့် ကိုယ်ကိုယ်တိုင် ကိုယ့်ကိုယ်ကို သူခိုးလို့ အထင်မခံမိစေဖို့၊ သူများကို ဒုက္ခပေး ပြုစားတတ်တဲ့ စုန်းလို့ အထင်မခံမိစေဖို့ အဓိကကျတယ်ဆိုတာ ပြောချင်တာပါ။ ဘယ်သူက ဘယ်လောက်ပဲ အထင်သေး၊ နှိမ့်ချနေပါစေ ကိုယ့်ကိုယ်တိုင် ကိုယ့်ကိုယ်ကို ပြန်ပြီး အထင်သေး၊ နှိမ့်ချမှု မဖြစ်စေဖို့ အရေးကြီးပါတယ်။ တကယ်တော့ ကိုယ့်ကိုယ်ကို ယုံကြည့်မှုရှိနေဖို့၊ အထင်မသေးမိဖို့က ကိုယ်ကိုယ်တိုင် အကျင့်သီလကောင်းနေမှ ဖြစ်မှာပါ။ မွဲနေတဲ့အပြင် အကျင့်ပါ မကောင်းဘူးဆိုရင်တော့ သူတပါးက အထင်သေးနှိမ့်ချတာကို ခံရတဲ့အပြင် ကိုယ်ကိုယ်တိုင်လည်း ကိုယ့်ကိုယ်ကိုယ် လိပ်ပြာမသန့် ဖြစ်တတ်ပါတယ်။ နောက်ဆုံးတော့ ရုပ်ပိုင်းဆိုင်ရာ ဘယ်လောက်ပဲ မွဲမွဲ ကိုယ့်ကိုယ်ကိုယ် အကျင့်မမွဲအောင် ကြိုးစားကြဖို့ပဲ ဖြစ်ပါတယ်။

ဒါကြောင့် လောကကြီးမှာ မွဲရင် တစ်လွဲအမြင်နဲ့ အစွဲအထင်တွေ ရှိတတ်သလို မလှရင်လည်း အလွဲအသုံးနဲ့ အမြဲမပြုံးတဲ့ စုန်းလို့ ထင်တတ်ကြပေမယ့် ဒီလိုထင်တတ်တာတွေဟာ ပစ္စုပ္ပန် သံသရာ ကောင်းစားရေးမှာ ဘာမှအဓိကမကျတဲ့အတွက် ဒီအထင်အစွဲတွေကို အမြင်မလွဲစေဘဲ ရုပ်ပိုင်းဆိုင်ရာ မွဲနေတာထက် စိတ်ပိုင်းဆိုင်ရာ၊ အကျင့်တရားဆိုင်ရာ၊ သဒ္ဓါတရားဆိုင်ရာ၊ စေတနာပိုင်းဆိုင်ရာ စတာတွေမှာ မမွဲရအောင်သာ သတိပညာနဲ့ ကြိုးစားနေထိုင်ကြဖို့ပဲ တိုက်တွန်းလိုက်ရပါတယ်။ အားလုံး လူမွဲပေမယ့် စိတ်မပွဲအောင် ကြိုးစားနိုင်ကြပါစေ..

Read more »

အရေးကြီးသည်မှာ…

လောက၌ လူအမျိုးမျိုး ရှိကြရာတွင် အချို့သူများသည် ပညာအားကောင်းကြ၏။ အချို့သည် တွေးခေါ်မှု အားကောင်းကြ၏။ အချို့သည် ၀ီရိယအားကောင်းကြ၏။ အချို့ကား လက်တွေ့အားသန်ပြီး အချို့ကား ကြံစည်မှု အားသန်ကြ၏။ မည်သို့ပင် အားသာချက် ကိုယ်စီရှိငြားသော်လည်း တစ်ခုတည်းကိုသာ စွဲကိုင်ထားပါက လွဲယိုင်သွားတတ်၏။ ပညာအားကောင်းသော်လည်း ကျင့်ကြံအားထုတ်မှုပါမှသာ လက်တွေ့အကျိုး ရနိုင်သကဲ့သို့ အတွေးအခေါ် အကြံအစည် အားသန်သူသည်လည်း တွေးတောကြံစည်နေရုံမျှနှင့်မပြီး လက်တွေ့အကောင်အထည်ဖော် လုပ်ဆောင်ကြည့်မှသာ ပြီးနိုင်၏။ အဓိကမကျသည့် အရာများတွင် တွေးတောကြံစည်ကာ ပညာဉာဏ် အားကောင်းနေသည်ထက် အဓိကကျသည့် အရာများတွင် လက်တွေ့လိုက်နာ ကျင့်သုံးခြင်းကသာ အလိုရှိရာ ပြီးမြောက်နိုင်၏။ အရေးကြီးသည်မှာ အကျိုးမပြီး အချည်းနှီးအရာများတွင် အချိန်ကုန် ပင်ပန်းနေကြသည်ထက် အဓိကကျပြီး လက်တွေ့အကျိုးကြီးနိုင်သည့် အရာများတွင် အချိန်ရှိခိုက် အားစိုက်လိုက်ကြသည်က ပိုပြီးအကျိုးစီးပွားကို ဖြစ်ထွန်းစေ၏။ ဘ၀သံသရာ ကောင်းကျိုးကို ဆောင်နိုင်ပေ၏။

ဗုဒ္ဓလက်ထက်က မာလုကျပုတ္တဟူသော မထေရ်တစ်ပါးသည် အတွေးအခေါ် အားကောင်းသည့် မထေရ်တစ်ပါး ဖြစ်၏။ မည်မျှအားကောင်းသည်ဆိုသော် ရဟန်းဘ၀တွင် အားထုတ်ရမည့် ရဟန်းတရားကို လက်တွေ့အားမထုတ်ဘဲ အရေးမကြီးသည့် အချည်းအနှီး အတွေးများဖြင့် အချိန်ကုန်နေသည်အထိ အားကောင်းခဲ့၏။ မိမိဉာဏ်ဖြင့် လိုက်မမီသည့် အရာများတွင် အတွေးနယ်ချဲ့ကာ တွေးတောအဖြေရှာနေတတ်၏။ တွေးတောကြံစည်နေခြင်းဖြင့် မည်သည့်အကျိုးမျှ မဖြစ်နိုင်သည့်အပြင် ဘ၀လွတ်မြောက်ရေး၊ ရဟန်းတရား အားထုတ်ရေးတွင် အရေးမကြီးသည့် အကြံအစီများဖြင့်သာ နေ့စဉ်အချိန်ကုန်နေတော့၏။

တစ်နေ့ ထိုမထေရ်သည် တစ်ပါးတည်းထိုင်ကာ “လောကသည် မြဲ၏ဟူ၍လည်းကောင်း၊ လောကသည် မမြဲဟူ၍လည်းကောင်း၊ လောကသည် အဆုံးရှိ၏ဟူ၍ လည်းကောင်း၊ လောကသည် အဆုံးမရှိဟူ၍လည်းကောင်း၊ အသက်သည်ပင် ကိုယ်ဟူ၍လည်းကောင်း၊ အသက်သည်တစ်ခြား ကိုယ်သည်တစ်ခြား ဟူ၍လည်းကောင်း၊ သတ္တ၀ါသည် သေသည်မှနောက်၌ ပြန်ဖြစ်သည်ဟူ၍လည်းကောင်း၊ သတ္တ၀ါသည် သေသည်မှနောက်၌ ပြန်မဖြစ်ဟူ၍ လည်းကောင်း၊ သတ္တ၀ါသည် သေသည်မှနောက်၌ ဖြစ်လည်းဖြစ်၏ မဖြစ်လည်းမဖြစ် ဟူ၍လည်းကောင်း၊ သတ္တ၀ါသည် သေသည်မှနောက်၌ ဖြစ်သည်လည်းမဟုတ် မဖြစ်သည်လည်း မဟုတ်ဟူ၍လည်းကောင်း စသည်ဖြင့် မြတ်စွာဘုရားသည် မဟောကြားဘဲ ထိမ်ချန်ထား၊ ပယ်ထားသည့် အယူများရှိ၏၊ ထိုအယူတို့ကို မြတ်စွာဘုရားသည် ငါ့အား ဟောကြားတော်မမူ၊ ထိုသို့ မဟောကြားဘဲ ချန်ထားသည်ကို ငါမနှစ်သက်၊ ငါသည် မြတ်စွာဘုရားထံ ချည်းကပ်၍ ဤအကြောင်းကို မေးလျှောက်အံ့၊ အကယ်၍ မြတ်စွာဘုရားသည် ဖြေကြားပေးခြင်း မရှိပါက ငါသည် ရဟန်းသိက္ခာကိုစွန့်ကာ လူထွက်တော့အံ့…” စသည်ဖြင့် တွေးတောကြံစည်နေ၏။ မာလုကျပုတ္တမထေရ်သည် မိမိအကြံအတိုင်းပင် မြတ်စွာဘုရား သာဝတ္ထိပြည် ဇေတ၀န်ကျောင်းတော်၌ သီတင်းသုံး နေတော်မူသည့် အချိန်ကိုစောင့်ကာ သွားရောက်၍ မေးလျှောက်လေတော့၏။ ဘုရားထံသွားကာ အကြပ်ကိုင်လေတော့၏။

ဘုရားထံမှောက် ရောက်သည့်အခါ မာလုကျပုတ္တမထေရ်သည် မိမိကြံစည်ထားသည့် အတွေးများ၏ အဖြေကို မေးလျှောက်လေတော့၏။ မြတ်စွာဘုရားသည် ထိုအဖြေများကို ဟောကြားတော်မမူဘဲ ချန်ထားသည်ဟုထင်ကာ အပြစ်တင်သည့် သဘောများဖြင့် လူထွက်မည်ဟုပင် အကြပ်ကိုင်လေ၏။ ထိုအခါ မြတ်စွာဘုရားရှင်က “မာလုကျပုတ္တ… ငါသည် သင့်ကို မာလုကျပုတ္တ သင်လာခဲ့လော့..၊ ငါဘုရားအထံမှာ မြတ်သောအကျင့်ကို ကျင့်လော့၊ သင်သိချင်သည့် လောကသည်မြဲခြင်း၊ မမြဲခြင်း၊ သတ္တ၀ါသည် သေသည်မှနောက်၌ တစ်ဖန်ပြန်ဖြစ်ခြင်း၊ မဖြစ်ခြင်း စသည့်မေးခွန်းများကို သင့်ကို ငါဘုရား ဟောကြားပေးမည်ဟု ဆိုခဲ့ဖူးသလော..” ဟု မေးတော်မူလိုက်၏။
“အရှင်ဘုရား… မဆိုခဲ့ဖူးပါဘုရား…”

“သင်ကလည်း ငါဘုရားကို သင်အလိုရှိတဲ့ မေးခွန်းတွေ ဖြေပေးမှ ရဟန်းပြုမည်၊ မြတ်သောအကျင့်ကို ကျင့်မည်ဟု ဆိုခဲ့ဖူးသလော…”
“အရှင်ဘုရား မဆိုခဲ့ဖူးပါဘုရား..”

“မာလုကျပုတ္တ ဤသို့ဆိုလျှင် ငါကလည်း သင့်ကို တစ်စုံတစ်ခုမျှ မဆိုခဲ့၊ သင့်ကလည်း ငါ့ကို တစ်စုံတစ်ခုမျှ မဆိုခဲ့ပါပဲလျှက် အဘယ်သူ တောင်းပန်သည်ဖြစ်၍ အဘယ်သူ့ကို တုံ့ပြန်ပြောကြားရမည်နည်း..၊ စင်စစ် သင်သည် ရဟန်းဘ၀ရနေသော်လည်း အရေးကြီးသည့်အရာကို မလုပ်ဘဲ မလိုအပ်သည်များတွင် အချိန်ကုန်နေသဖြင့် မဂ်ဖိုလ်မပြီး အချည်းနှီးသာဖြစ်နေ၏…”ဟု နောက်ဆုံးတွင် ဘုရားရှင်က မာလုကျပုတ္တအား ပြစ်တင်ပြောဆို ဆုံးမကာ အရေးကြီးသည့်အရာနှင့် အရေးမကြီးသည့် အရာများကို ခွဲခြားပြသ ဟောကြားတော်မူခဲ့၏။

ဗုဒ္ဓက “မာလုကျပုတ္တ… အကယ်၍ တစ်စုံတစ်ယောက်သည် လောကသည် မြဲမမြဲ၊ သတ္တ၀ါ သေသည်မှနောက်၌ ဖြစ်မဖြစ် စသည့်အကြောင်းအရာများကို မြတ်စွာဘုရားသည် မဟောကြားပေးသမျှ မြတ်သောအကျင့်ကို ငါမကျင့်ဟု ဆိုလာငြားအံ့၊ ထိုသူသည် မြတ်သောအကျင့်ကို မကျင့်မီ သို့မဟုတ် မကျင့်ရဘဲနှင့်ပင် သေလွန်ရာ၏၊ အကြောင်းကား ထိုကဲ့သို့သော အချည်းနှီးကိစ္စများအား ငါဘုရားသည် ဟောကြားပေးမည် မဟုတ်သောကြောင့်ပင် ဖြစ်၏…” “မာလုကျပုတ္တ… ဥပမာအားဖြင့် ပြင်းထန်သည့် အဆိမ်လူးမြားဖြင့် အပစ်ခံရသူသည် ရှေးဦးစွာ အဆိပ်လူးမြားကို နှုတ်ကာအသတ် အရင်ကယ်ရမည် ဖြစ်သော်လည်း အဓိကကျသည့် အရာကိုမလုပ်ဘဲ ဤအဆိပ်လူးမြားကို မည်သူကပစ်လိုက်သည်၊ ဤမြားသည် မည်သည့်နေရာက လာသည်၊ မည်သည့်အကြောင်းကြောင့် အပစ်ခံရသည် စသည်ဖြင့် မြားပစ်သူကို လိုက်ရှာနေပါက ထိုသူကို မတွေ့မီပင် အသက်သေသွားရာ သကဲ့သို့ ထို့အတူ သင်သည်လည်း အဓိကအရေးကြီးသည့် ရဟန်းတရားကို အားမထုတ်သေးဘဲ လောကအကြောင်း သတ္တ၀ါအကြောင်း စကြာဝဠာအကြောင်း စသည်များကို ဘုရားမဟောသေးသမျှ မြတ်သောအကျင့်ကို မကျင့်ဟု တွေးတောနေပါက ထိုမြတ်သောအကျင့်ကို မကျင့်ရသေးမီပင် သေလွန်သွားနိုင်ရာ၏…”

“မာလုကျပုတ္တ… လောကသည် မြဲသည်ဖြစ်စေ၊ မမြဲသည်ဖြစ်စေ၊ သတ္တ၀ါသည် ဘ၀သစ်တွင် ဖြစ်သည်ဖြစ်စေ၊ မဖြစ်သည်ဖြစ်စေ ထိုအတွေးများရဲ့ အဖြေကို တိကျစွာ သိသည်ဖြစ်စေ၊ မသိသည်ဖြစ်စေ တွေးခေါ်သူအတွက် တစ်စုံတစ်ခုမျှ ထူးခြားလာမည်မဟုတ်၊ ထိုအတွေးများ၊ အဖြေများ မှန်မှားဖြစ်နေငြားလည်း ပဋိသန္ဓေနေရမှုများ၊ အိုရမှုများ၊ သေရမှုများ၊ ပူဆွေးငိုကြွေးခြင်းများ၊ ကိုယ်ဆင်းရဲခြင်း၊ စိတ်ဆင်းရဲခြင်းများ စသည်တို့သည် ရှိနေကြမည်သာ ဖြစ်၏၊ စင်စစ် လောကအကြောင်း သတ္တ၀ါအကြောင်းစသည် တွေးနေခြင်းထက် ရှေးဦးစွာ လုပ်သင့်သည်မှာ ပဋိသန္ဓေနေခြင်း၊ အိုခြင်း၊ သေခြင်း၊ စိုးရိမ်ပူဆွေးခြင်းစသည်တို့ကို ယခုမျက်မှောက်ဘ၀မှာပင် ဖျက်စီးနိုင်အောင် ကြိုးစားနိုင်ခြင်းကသာ ပိုပြီးအရေးကြီး၏၊ ထိုအရာများကို ဖျက်စီးပစ်နိုင်ရန်ကိုသာ ငါဘုရားပညတ်တော်မူ၏…”

“မာလုကျပုတ္တ… ငါဘုရား၏ သာသနာတော်တွင် သင်သည် ငါဘုရား မဟောကြားသည်ကို မဟောကြားသည့်အတိုင်း၊ ဟောကြားသည်ကို ဟောကြားသည့်အတိုင်းသာ မှတ်သားလော့၊ လောကသည် မြဲ၏ဟူ၍လည်းကောင်း၊ မမြဲဟူ၍လည်းကောင်း၊ အသက်သည်ပင် ကိုယ်ဟူ၍လည်းကောင်း၊ အသက်တစ်ခြား ကိုယ်တစ်ခြား စသည်ဖြင့်လည်းကောင်း၊ သတ္တ၀ါ သေသည်မှနောက်၌ ဖြစ်၏၊ မဖြစ်၊ ဖြစ်လည်းဖြစ်၏၊ ဖြစ်လည်းမဖြစ် စသည်ဖြင့်လည်းကောင်း လောကအကြောင်း သတ္တ၀ါအကြောင်း စသည်တို့ကို ငါဘုရား ဟောကြားတော်မမူ၊ အကြောင်းကား ဟောကြားခြင်းဖြင့် အကျိုးစီးပွားနှင့်မစပ်၊ မြတ်သောသာသနာတော်၏ အစအနမျှလည်း မဖြစ်၊ ၀ဋ်ဆင်းရဲကို ငြီးငွေ့ခြင်းငှါ၊ ရာဂကင်းခြင်းငှါ၊ ရာဂချုပ်ခြင်းငှါ၊ ကိလေသာ ငြိမ်းခြင်းငှါ၊ သစ္စာလေးပါးကို သိမြင်ခြင်းငှါ စသည်ဖြင့် မဖြစ်သောကြောင့်တည်း..” “မာလုကျပုတ္တ… ဤကား ဆင်းရဲတည်း၊ ဤကား ဆင်းရဲဖြစ်ကြောင်းတည်း၊ ဤကား ဆင်းရဲချုပ်ရာတည်း၊ ဤကား ဆင်းရဲချုပ်ရာသို့ ရောက်ကြောင်း အကျင့်တည်း စသည်ဖြင့် ငါဘုရား ဟောကြားတော်မူ၏၊ အကြောင်းကား ထိုတရားသည် အကျိုးစီးပွားနှင့် စပ်ယှဉ်၏၊ သာသနာအတွက် အားအင်ဖြစ်၏၊ ၀ဋ်ဆင်းရဲ၌ ငြီးငွေ့ခြင်းငှါ၊ ကိလေသာရာဂ ကင်းငြိမ်းခြင်းငှါ၊ သစ္စာလေးပါးကို သိမြင်ခြင်းငှါစသည်ဖြင့် အကျိုးဖြစ်သောကြောင့်တည်း၊ ထို့ကြောင့် သင်သည် ငါဘုရား မဟောကြားသည်ကို မဟောကြားသည့်အတိုင်း၊ ဟောကြားသည်ကို ဟောကြားသည့်အတိုင်း မှတ်သားလိုက်နာ ကျင့်ကြံလေလော့...” စသည်ဖြင့် အကျယ်မိန့်တော်မူလိုက်၏။ နောက်ဆုံးတွင် မာလုကျပုတ္တမထေရ်သည် မြတ်စွာဘုရား၏ တရားတော်ကို နှစ်သက်ကျေနပ်စွာ လက်ခံသွားလေတော့၏။ (မဇ္ဈိမပဏ္ဏာသ၊ ဘိက္ခုဝဂ်၊ စူဠမာလုကျသုတ်) ဤကား ဗုဒ္ဓလက်ထပ် အတွေးအခေါ်ပိုင်းတွင် အားသာကာ အရေးကြီးသည့် အပိုင်များတွင် မလုပ်ဖြစ်ဘဲ အချည်းနှီး အချိန်ကုန်နေခဲ့သည့် မာလုကျပုတ္တ မထေရ်အကြောင်း တစ်စေ့တစ်စောင်းသာ ဖြစ်၏။

မျက်မှောက်ခေတ်တွင်လည်း မာလုကျပုတ္တကဲ့သို့ အတွေးနယ်လွန်သူများရှိ၏။ အရေးကြီးသည်ကို အကောင်အထည်မဖော်ဘဲ မိမိအတွက်လည်း အကျိုးမပြီး အများအတွက်လည်း အထောက်အကူ မပြုသည့် အရာများဖြင့် အချိန်ကုန်နေသူများ ရှိ၏။ ထိုသူများသည် မြတ်ဗုဒ္ဓမိန့်တော်မူသကဲ့သို့ပင် အဆိပ်လူမြားကို အရင်မနှုတ်ဘဲ မြားပစ်သူကို လိုက်ရှာနေသူနှင့် တူနေပေ၏။ စင်စစ် မလိုအပ်သည်များ၊ မိမိဉာဏ်နှင့် လိုက်မမီသည်များတွင် အချိန်ကုန်နေမည့်အစား လက်တွေ့ကျသည့် ကျင့်ကြံအားထုတ်မှုများဖြင့် အကောင်အထည် ဖော်နိုင်ရန်သာ ကြိုးစားအားထုတ်သင့်လှ၏။ မြတ်ဗုဒ္ဓ၏ အချို့အရာများသည် သဗ္ဗညုတဉာဏ်ဖြင့် ဟောကြားထားသည့်အရာများ ဖြစ်သဖြင့် မိမိ၏ အသိဉာဏ်နှင့် လိုက်မမီနိုင်သည်များ ရှိတတ်၏။ ထိုသို့သော အရာများတွင် မရရအောင် တွေးတောကြံစည်နေကြလျှင် အချိန်သာကုန်ပြီး အကျိုးမပြီး ဖြစ်နေတတ်၏။ အရေးကြီးသည်မှာ မိမိလုပ်နိုင်သည့်၊ လုပ်သင့်သည့် အရာများကို လက်တွေ့အကောင်အထည်ဖော် လုပ်ဆောင်ရန်သာ ဖြစ်၏။ လက်တွေ့ကျင့်ကြံမှုဖြင့်သာ သိရန်ကြိုးစားသင့်၏။ မြတ်ဗုဒ္ဓက ဝေဘန်စိစစ် လက်ခံရန် ဟောကြားထားသော်လည်း အကျိုးစီးပွားနှင့် မစပ်သည့် အရာများတွင် အချိန်ကုန်ခံကာ ဝေဘန်စိစစ်နေစေရန် ဟောတော်မူခြင်း မဟုတ်ပေ။ မိမိသူတစ်ပါး အကျိုးများစေပြီး ကိလေသာကုန်ရာ အကျင့်တရားများကိုသာ နည်းမှန်လမ်းမှန် စနစ်မှန်ဖြင့် ကျင့်ကြံပွားများနိုင်စေရန် ပညာနှင့်စိစစ်ကာ လက်တွေ့လိုက်နာစေလိုခြင်း ဖြစ်၏။ အသိတရားတွင်သာ ရပ်တန့်မနေဘဲ အကျင့်တရားပါ ကျင့်ကြံစေရန် တိုက်တွန်းတော်မူခြင်း ဖြစ်၏။ အရေးမကြီးသည့်အရာများတွင် အချိန်မကုန်စေဘဲ အရေးကြီးသည်များကို လက်တွေ့အကောင်အထည်ဖော် လုပ်ဆောင်စေလိုခြင်း ဖြစ်၏။ အဓိကကျသည်မှာ အသိနောက်ကို အကျင့်လိုက်စေလိုရင်း ဖြစ်၏။

ထို့ကြောင့် မာလုကျပုတ္တကဲ့သို့ စကြာဝဠာကြီး ဘယ်ကစသည်၊ လူသားများ ဘယ်ကစသည်၊ ကံတရား၏ အတိုင်းအဆ မည်မျှရှိသည် စသည်ဖြင့် သိခြင်း၊ မသိခြင်းဖြင့် လွတ်မြောက်ရေး၌ အထောက်အကူ မဖြစ်သည့် အချည်းအနှီး အတွေးအခေါ်များတွင် အချိန်ပေးကာ တွေးနေကြသည်ထက် သံယောဇဉ်ကုန်ရာ၊ ကိလေသာကုန်ရာ၊ နောက်ထပ်တစ်ဖန်၊ မွေးခြင်း၊ အိုခြင်း၊ နာခြင်း၊ သေခြင်းစသည် ကင်းရာဖြစ်သည့် လက်တွေ့အကောင်အထည်ဖော် ကျင့်ကြံရမည့် အရာများကို လိုက်နာကျင့်သုံး နေထိုင်ခြင်းကသာ အရေးကြီးသည့်အရာများ ဖြစ်သဖြင့် မြားပစ်သူကို လိုက်ရှာမနေကြဘဲ မြားကိုသာ အရင်ဆုံး နှုတ်နိုင်အောင် ကြိုးစားကြရင်း အချိန်ရှိခိုက်၊ လုပ်နိုင်သည့်အခိုက်တွင် မိမိ၏ ပစ္စုပ္ပန်အကျိုး၊ သံသရာအကျိုး ပွားတိုးစေမည့် လုပ်ရပ်များကိုသာ အသိနှင့်အကျင့် ထပ်တူဖြစ်ရန် ကြိုးစားသင့်ပါကြောင်း အသိပေးတင်ပြလိုက်ပါ၏။ အရေးကြီးသည်မှာ ကျင့်ကြံအားထုတ်မှုသာ အဓိက ဖြစ်ပါပေတော့၏။

Read more »

မိန်းမဘ၀မှ လွန်မြောက်ချင်ရင်…

Q. အရှင်ဘုရားကို မေးခွန်းတစ်ခုလောက် မေးချင်နေမိတာ ဘယ်မှာ မေးရမှန်းမသိလို့ ဒီcomment မှာပဲ မေးလိုက်ပါတယ်ဘုရား....။ တပည့်တော် သူငယ်ချင်း မိန်းခလေး တစ်ယောက်က နောက်ဘဝမှာ ယောကျာ်းလေး အရမ်းဖြစ်ချင်နေပါသည် ဘုရား၊ အဲဒါ ဒီဘဝမှာ ဘာကောင်းမှု ကုသိုလ်ကို အလေးပေး လုပ်ဆောင်ရမယ်ဆိုတာကို ကရုဏာရှေ့ထား ဖြေကြား ပေးတော်မူပါဘုရား.....။
ကိုဗညား(ခေတ္တ စင်ကာပူ)

A. ဒကာတော်ရေ… မေးချင်တဲ့ မေးခွန်းလေးတွေကို ဒီစာမျက်နှာရဲ့ ဆက်သွယ်ရန်မှာ ဖော်ပြထားတဲ့ အီးမေးလ်မှပဲ ဖြစ်ဖြစ်၊ ဒီစာမျက်နှာရဲ့ အောက်ဆုံးမှာ ဖွင့်ထားတဲ့ Live Questions and Answers ကဏ္ဍမှာပဲ ဖြစ်ဖြစ် မေးမြန်းနိုင်ပါတယ်။ အချိန်ရရင် ရသလို ဖြေပေးသွားပါမယ်။ အခု ဒကာတော်မေးတဲ့ မေးခွန်းကို ဖြေကြားပေးရမယ်ဆိုရင် အင်္ဂုတ္တရပါဠိတော် သံယောဂသုတ်မှာ ဟောကြားထားတဲ့ တရားတော်ကိုပဲ ကိုးကား ဖြေကြားပေးပါမယ်။ ဒီသုတ်တော်မှာ မိန်းမအဖြစ်၊ ယောက်ျားအဖြစ်မှ လွန်မြောက်နိုင်တဲ့ အချက်တွေကို ဖော်ပြထားပါတယ်။ တကယ်လို့ အမျိုးသမီးတစ်ယောက်ဟာ ကိုယ့်ရဲ့မိန်းမ ဘ၀ကို မလိုချင်ဘူး ဒီဘ၀ကနေ လွန်မြောက်ချင်တယ်ဆိုရင် ကိုယ့်သန္တာန်မှာ ရှိနေတဲ့ မိန်းမဣနြေ္ဒ၊ မိန်းမအမူအရာ၊ မိန်းမအသွင်အပြင်၊ မိန်းမမာန၊ မိန်းမအလိုဆန္ဒ၊ မိန်းမအသံ၊ မိန်းမအ၀တ်တန်ဆာတွေ အပေါ်မှာ တပ်မက်တဲ့ တဏှာဆန္ဒနဲ့ နှလုံးမသွင်းဖို့ လိုသလို မိန်းမတစ်ယောက်အနေနဲ့ ယောက်ျားတစ်ယောက်အပေါ်မှာ ဖြစ်တတ်တဲ့ အဲဒီယောက်ျားရဲ့ ဣနြေ္ဒ၊ အမူအရာ၊ အသွင်အပြင်၊ မာန၊ အလိုဆန္ဒ၊ အသံ၊ အ၀တ်တန်ဆာ စတာတွေနဲ့ ပတ်သက်ပြီး တွယ်တာတပ်မက်မှု မရှိဖို့လိုပါတယ်။ အဲဒီအချက်တွေကို မဖြစ်အောင်ကြိုးစားပြီး ဘယ်လိုကုသိုလ်မျိုးပဲ ဖြစ်ဖြစ် ကုသိုလ်လုပ်တိုင်းလုပ်တိုင်း ယောက်ျားဘ၀ကို ရလိုတဲ့ ဆန္ဒဆုတောင်းနဲ့ လုပ်မယ်ဆိုရင် ကောင်းမှုကုသိုလ်ဟာ တောင်းတတဲ့အတိုင်း ဖြစ်ပေါ်စေမှာ ဖြစ်တဲ့အတွက် လိုချင်တဲ့ ယောက်ျားဘ၀ကို ရနိုင်ပါတယ်။ အဓိကကတော့ ရရှိထားတဲ့ မိန်းမဘ၀အပေါ်မှာ ကျေနပ်နှစ်သက် စွဲလန်းတပ်မက်မှု မဖြစ်ဖို့ရယ် ဒီလိုမိန်းမဘ၀ကို ကျေနပ်နေမှုနဲ့ ယောက်ျားတစ်ယောက်အပေါ်မှာ မိန်းမတစ်ယောက်က တပ်မက်စွဲလန်းတတ်တဲ့ စွဲလန်းနေမှုမျိုး မဖြစ်ဖို့ လိုပါတယ်။ ရရှိထားတဲ့ ဘ၀အပေါ်မှာ တပ်မက်နှစ်သက်နေရင် နောက်ထပ်တစ်ခါ ဒီဘ၀မှာပဲ ပြန်လည်ဖြစ်တတ်တဲ့ ဘ၀တဏှာက ရှိနေတဲ့အတွက် မိန်းမဘ၀ကို မလိုချင်ရင် မိန်းမနဲ့ပတ်သက်တာတွေအပေါ် မတပ်မက်ဖို့ပဲ ဖြစ်ပါတယ်။

ဒါက မေးသူရှိလို့ ဘုန်းဘုန်းအနေနဲ့ ဖြေပေးလိုက်ရတာ ဖြစ်ပါတယ်။ တကယ်တော့ သံသရာနဲ့ ယှဉ်ကြည့်ရင် ဘယ်လိုဘ၀မျိုးမှ မကောင်းပါဘူး။ ယောက်ျားဘ၀မှာလည်း ဒုက္ခတွေနဲ့ ကြုံတွေ့နေရမှာ ဖြစ်သလို မိန်းမဘ၀မှာလည်း ဆင်းရဲဒုက္ခတွေနဲ့ ကြုံတွေ့နေရမှာ ဖြစ်ပါတယ်။ ဘ၀ကိုဖြတ်နိုင်မှ ဒီဘ၀တွေရဲ့ ဒုက္ခမှ လွတ်မြောက်နိုင်မှာ ဖြစ်ပြီး ဘ၀ကင်းရာ နိဗ္ဗာန်ကို ရောက်နိုင်မှာဖြစ်ပါတယ်။ ဘ၀ကို လိုချင်တပ်မက်နေသမျှ ရလာတဲ့ဘ၀မှာ ဒုက္ခပေါင်းစုံ၊ ကိလေသာအစုံနဲ့ တစ်ခါပြန်ပြီး ကျင်လည်ကြရဦးမှာ ဆိုတာ သတိပြုစေချင်ပါတယ်။ အကောင်းဆုံးကတော့ မိန်းမဘ၀ပဲ ဖြစ်ဖြစ်၊ ယောက်ျားဘ၀ပဲ ဖြစ်ဖြစ် လက်ရှိရထားတဲ့ ဘ၀မှာ နောက်ထပ်ပြန်ပြီး ဘ၀မဖြစ်ရေး ကြိုးစားလိုက်ခြင်းကသာ အကောင်းဆုံးပဲ ဖြစ်ပါတယ်။ လက်ရှိရထားတဲ့ ဘ၀အရ မိန်းမဘ၀ဟာ အရာရာ အခက်အခဲတွေ ရှိနေတတ်ပေမယ့် နိဗ္ဗာန်ရရေး၊ ကိလေသာကုန်ရေးမှာတော့ မိန်းမဖြစ်လို့ ကိလေသာ မကုန်ရဘူး၊ နိဗ္ဗာန်မရနိုင်ဘူးဆိုတာ မရှိပါဘူး။ မိန်းမဘ၀မှာပဲ ကိလေသာကုန်အောင် ကြိုးစားအားထုတ်နိုင်ပါတယ်။ ဒါကြောင့် ဖြစ်နိုင်ရင်တော့ နောက်ထပ် ဘယ်လိုဘ၀မျိုးကိုမှ တောင့်တမနေတော့ဘဲ အခုဘ၀မှာပဲ လွတ်မြောက်ရာလမ်းကို ကြိုးစားရှာဖွေတာက အကောင်းဆုံးပဲလို့ အကြံပြုလိုပါတယ်။ အင်း… ဘာပဲဖြစ်ဖြစ် နောက်ဘ၀တွေမှာ ယောက်ျားဘ၀ကိုပဲ ရချင်နေတယ်ဆိုရင်တော့ ခုနပြောခဲ့တဲ့ အချက်တွေနဲ့အညီသာ ကြိုးစားကြည့်ပါလို့ ဖြေကြားပေးလိုက်ပါတယ်။

Read more »


RECENT POSTS

သူတုို့သူတုို့၏ မှတ်ချက်များ