ကုသိုလ်တစ်ခု နေ့စဉ်ပြု
ကြီးသည်သေးသည် ရွေးမစီဘဲ
ကုသိုလ်တစ်ခု နေ့စဉ်ပြုက
ပြုဖန်ပါများ ထိုကံများကား
ကုသိုလ်ပြုသူ များထိုသူကို
အခုချမ်းသာ နောင်ချမ်းသာအောင်
ကောင်းမှုအစွမ်း အံ့မခမ်းဖြင့်
အကြောင်းအစု အကောင်းပြုမည်
မုချအမှန် မလွဲတည်း။ ။
ဘဝနဲ့ ဓမ္မ
ဘဝမှာ ဓမ္မမပါရင်
အလှဆိုတာ ခဏပါပဲ။
အငယ်တွေလည်း ဘဝထဲမှာ ဓမ္မတွဲမှ
အလတ်တွေလည်း ဘဝအဖြာဖြာမှာ ဓမ္မပါမှ
အကြီးတွေလည်း ဘဝအဆုံး ဓမ္မသုံးမှ
တွေ့ကြုံလာရ တက်အကျနဲ့
အကောင်းအဆိုး ကြောင်းအကျိုးကို
ဓမ္မစကား၊ ဓမ္မအားနဲ့
အလှတရား ရသွားစေမှာ အမှန်ပါပဲ။
တွေကာမနှေး အသေအချာတွေးရင်
ဓမ္မဆိုတာ အကျင့်သိက္ခာ အဖြာဖြာနဲ့
အသိသတိ ထပ်တူရှိမယ့်
အဆင့်မခွဲ အကျင့်မြဲရေးပါပဲ။
ဒါကြောင့်...
အစနဲ့အဆုံး
ဘဝတစ်ခုလုံးမှာ အလှတွေဖုံးစေဖို့
ခဏမကြည့် ဓမ္မနဲ့ညှိပြီး
အသိအကျင့် ထပ်တူဆင့်လျက်
ဘဝထဲမှာ ဓမ္မတွဲကာ
လိုရာပန်းတိုင် သင်ဆွဲကိုင်လော့။ ။
မဇ္ဈိမလမ်း အကျင့်စွမ်း
“မြင်အောင်ကြည့်ပါ ထင်ယောင်မမိပါနဲ့
သိအောင်တွေးပါ ထိအောင်မတွေးပါနဲ့
မှန်အောင်ပြောပါ ကြံဆောင်မပြောပါနဲ့
ကောင်းအောင်လုပ်ပါ စောင်းအောင်မလုပ်ပါနဲ့
ဖြောင့်အောင်မွေးပါ မှောင့်အောင်မမွေးပါနဲ့
ဟုတ်အောင်ထုတ်ပါ ပုတ်အောင်မထုတ်ပါနဲ့
ကြိုကြိုသိပါ အပိုအလိုမရှိပါနဲ့
ငြိမ်အောင်လုပ်ပါ တိမ်တောင်မလုပ်ပါနဲ့”
စတဲ့စကားများ အခမဲ့ကြားနေငြားလည်း
အခမဲ့နေလို့လားမသိ အမှတ်တမဲ့ပင် များနေဘိ၏။
အများတကာ မသိလို့ မှားတာတွေ ရှိပေမယ့်
အမှားတွေကြား အများတကာလို မမှားရအောင်
အမှန်အသိနဲ့ ပြန်ညှိကြဖို့
မှန်ကန်တဲ့အမြင်၊ မှန်ကန်တဲ့အတွေး
မှန်ကန်တဲ့အပြော၊ မှန်ကန်တဲ့အလုပ်
မှန်ကန်တဲ့အသက်မွေးမှု၊ မန်ကန်တဲ့ အားထုတ်မှု
မှန်ကန်တဲ့ သတိရှိမှု၊ မှန်ကန်တဲ့ တည်ကြည်မှုတွေနဲ့
အသိပညာ အကျင့်ပါအောင်
မြင့်ရာရည်မှန်း အရောက်လှမ်းဖို့
အလယ်အလတ်လမ်း အကျင့်စွမ်းဖြင့်
လိုရာပန်းတိုင် သင်စွဲကိုင်လော့...။ ။
မချစ်မမုန်း အကောင်းဆုံး
ချစ်ခြင်း မုန်းခြင်း နှလုံးသွင်းမှာ
အချစ်များက အပြစ်များ၍
အမုန်းများက အရှုံးပွား၏။
ချစ်ခြင်းမုန်းခြင်း ရှောင်ကြဉ်ကင်း၍
မေတ္တာ (ဥပေက္ခာ) နှလုံး ကျင့်ကာသုံးသည့်
အဖြူစင်ဆုံး ဤကျင့်ထုံးကား
အပြစ်လည်းကင်း အရှုံးကင်းမည့်
မချစ်မမုန်း အကောင်းဆုံးတည်း။ ။
ကောင်းမှုအစု ကြိုးစားပြုလော့
ဘယ်အရွယ်မှာ၊ ဘယ်ရောဂါဖြင့်
ဘယ်ရပ်ဒေသ၊ ဘယ်ကာလ၌
သေကြရမည်၊ မသိနိုင်တာ ဓမ္မတာတည်း။
သေပြီးတစ်ဖန်၊ ပြန်ဖြစ်ပြန်လည်း
ဖြစ်ရာဘ၀၊ ဘုံဌာနကို
ကြိုတင်တိကျ၊ မသိရ၍
တိကျသေချာ၊ ခုချိန်ခါ၌
ကောင်းမှုအစု၊ ကြိုးစားပြုလော့။ ။
0 မှတ်ချက်များ (...ရေးရန်):
Post a Comment